“Truth will set you free,” ika nga niya.
Kailangan ko ang lahat ng tapang sa mundo para magawa kong ipagtapat kung ano ba talaga ang nararamdaman ko. Ewan ko ba kung bakit napakahirap. Ito naman ang katotohanan. Tila kasi sa lipunang ito ay mas madali pa ang pagtalikod sa nararamdaman kaysa magtapat. Dahil siguro ito sa patriyarkal na pananaw na nananaig sa ating lipunan at naipunla sa ating isipan.
Pero ngayon na ang panahon para basagin ang pananaw na ito. Alam ko na sa pagiging tapat ko lang makakamit kung ano ba talaga ang nais ko at magiging madali ang pagkilos ko. Bakit ka matatakot kung ang lalabas sa iyong bibig ay pawang katotohanan? Sabi ko nga sa isang kaibigan, "Paano natin maaabot ang pinapangarap kung tatalikdan natin ang katotohanan at magkukubli na lang sa mga kasinungalingan?"
